#
最近又一口氣睇曬Daisy既兩本新書，我好似無分享過我好鍾意王迪詩 @daisywong_author 。
我係佢9年前出《我是我，王迪詩》個陣，已經好鍾意佢，佢既性格係我好鍾意既類型，有諗法，做自己，唔太在意人地眼光，不斷勇於挑戰，仲有好多，想了解多啲就睇佢寫既野。
關於《鬼故》
- 呢本我自己係好鍾意既，亦都真係講鬼既，細膽驚鬼既可能唔敢睇，或姐我都唔建議你睇，但自問唔係細膽，同我一樣，又好奇又八卦，呢本書就岩曬你，因為我認認真真覺得好有趣。
首先，你信唔信有鬼？
- 我一直對呢個問題保持open-minded，科學解釋唔到有無，然後我覺得有又唔出奇，同成日都聽到朋友撞鬼既經歷。
書內容就全本書都講緊真人真事，會有陰陽眼既人，有撞鬼既經歷，有預測未來既，亦有作者既親身經歷，我自己就覺得睇到好過引，對呢方面有興趣既朋友可以買黎睇下。
關於《長大了才明白的二三事》
- 都係Daisy 平時寫開既類型，關於人生觀、事業、愛情等等，我無睇曬佢寫既每本書，因為佢寫既好多野我都明，但佢寫既野我一直都好認同，每次睇佢既人生經歷同身邊朋友既故事都好值得反思，每次睇佢寫既野都會提醒自己，我自己係一個咩人，同千奇唔好做邊種人。
有留意我既朋友都知，我轉左一半係睇電子書，因為我書櫃無位放，但因為Daisy既書無電子版，所以又買左兩本支持下。
如果你係女仔，基本上你睇得完一本佢既書，你會不自覺地愛上佢，（男仔可能都會？我唔清楚），但我好想分享比更加多女仔知。
最後，閱讀對我黎講最開心既事係從文字了解一個人，了解對方既經歷同思維模式，我有好多鍾意既書同好多鍾意既作者，只係我鍾意既程度高低既差別，每一個人都有我值得學習既地方，希望你地都搵到閱讀既樂趣。
#ReadwithR
#鬼故
#長大了才明白的二三事
Search